Memleket basshysynyń tapsyrmasyna sáıkes 2024 jylǵy 1 qańtardan bastap Qazaqstanda «Ulttyq qor – balalarǵa» baǵdarlamasy bastaý aldy. Bul bastama aıasynda Ulttyq qordyń ınvestısııalyq tabysynyń 50 paıyzy jyl saıyn 18 jasqa tolmaǵan azamattarǵa bólinedi, dep habarlaıdy Egemen.kz.
Qarajat balalarǵa týǵan sátinen bastap avtomatty túrde ashylatyn jeke shottarǵa aýdarylady jáne ol úshin qosymsha ótinish berý talap etilmeıdi.
Bul qadam Qazaqstan úshin erekshe bastama, sebebi álemde tabıǵı resýrstardan túsken tabysty tikeleı ár balanyń jeke jınaǵyna baǵyttaıtyn elder óte az.
Baǵdarlama búginde eldegi balalardyń basym bóligin qamtyp otyr. Birinshi jyly ár balaǵa 100,52 AQSh dollary eseptelse, 2026 jyly bul soma 130,71 AQSh dollaryna deıin ósti. Qazirgi tańda qatysýshylar sany shamamen 6,9 mıllıon balany quraıdy.
«Ulttyq qor – balalarǵa» prezıdenttik baǵdarlamasy: 3 jyl ishinde balalarǵa 2,5 mlrd dollardan astam qarajat aýdaryldy
Baǵdarlama iske qosylǵan sátten bastap qatysyp kele jatqan balalardyń jınaqtary ınvestısııalyq tabysty eseptegende 370 dollar 56 sentke jetti. Bul tetik bir rettik qoldaý emes, kerisinshe bolashaq urpaqtyń ál-aýqatyn arttyrýǵa baǵyttalǵan uzaq merzimdi turaqty qural ekenin kórsetedi.
Eske sala keteıik, byltyr jyl sońynda Ulttyq qor balalarǵa 888 mln dollar aýdarǵan bolatyn.